Adobo sa Gata

INUMAGA NA naman ako ng tulog.

Marami akong ginawa e; ngayon-ngayon lang ako natapos. Ay, siya nga pala. Adobo sa gata ang ulam namin kanina.

Pinag-iisipan ko kung sa Instagram ko ba dapat ibinabalandra itong mga litrato ng putaheng niluluto ko. Parang mas bagay kasi sa Instagram ang daily mema posts, hindi ba? Bukod pa riyan, mas kaunti rin ang nakakaalam ng Instagram ko. Mas kaunti ang quote followers unquote, mas kaunti ang puwedeng maasar sa kasabawan ko.

May dalawa nga lang akong issue. Una, ayaw kong magmando ng isa na namang social media account. Ikalawa, tinatamad akong magsundot ng extra effort para gumanda at maging consistent ang mga litrato ko.

‘Ayan tuloy, pinagmukha kong Instagram itong blog ko. Kaya pasintabi na lang sa daily ulam posts ko, ha? Gusto ko lang talagang malaman ninyo na, well, napakasarap kong magluto ng adobo. Charaught.